«Барселона» футболчилари Ла Лиганинг 29-тури доирасида «Райо Вальекано»га қарши ўйин олдидан жамоанинг собиқ ҳужумчиси Роналдиньонинг 46 ёшга тўлиши муносабати билан унинг номи туширилган футболкаларни кийишди.
Бразилиялик футболчи 2003–2008 йиллар давомида «кўк-анорранглилар» сафида тўп сурган. Ушбу давр мобайнида Роналдиньо барча турнирларда 207 та учрашувда иштирок этиб, 94 та гол ва 70 та голли узатма амалга оширган. 2005 йилда ҳужумчи «Олтин тўп» соҳиби бўлган. Шунингдек, у «Барселона» билан икки марта Испания чемпионига айланган, икки бор Суперкубокни қўлга киритган ҳамда Чемпионлар лигасида ғалаба қозонган.
28 турдан сўнг «Барселона» 70 очко жамғариб, мусобақа жадвалида биринчи ўринни эгаллаб турибди.













