«Тоттенхэм» ўз мухлисларини яна бир бор ранжитди. Якшанба куни Игор Тудор жамоаси ўз майдонида «Ноттингем Форест»га 0:3 ҳисобида имкониятни бой берди. Натижада «шпорлар» Премьер-лига турнир жадвалида 17-ўринга тушиб кетишди.
Қизиғи шундаки, Игор Тудор ушбу учрашувдан сўнг журналистлар билан мулоқот қилишдан бош тортди. Хорватиялик мутахассис ўрнига матбуот анжуманига унинг ёрдамчиси ташриф буюрди. Оммавий ахборот воситалари вакилларига Тудор «оилавий шароитга кўра» кела олмагани айтилди.
Миш-мишларга кўра, терма жамоалар ўйинлари муносабати билан юзага келадиган танаффус вақтида Игор Тудор истеъфога чиқарилиши мумкин. Янгиликларни кузатишда давом этамиз.
