Мадриднинг «Реал» клуби бош мураббийи Альваро Арбелоа «Атлетико»га қарши баҳсда (3:2) ўнг қанот ҳимоячиси Трент Александр-Арнольдни асосий таркибда майдонга туширмаслик қарорига изоҳ берди.

Англиялик футболчи ўйиннинг фақатгина 64-дақиқасига келиб майдонда кўриниш берди. Тарқалган миш-мишларга кўра, «қаймоқранглилар» устози Трентни машғулотга кечиккани учун жазолаган, бироқ испаниялик мутахассиснинг ўзи бу маълумотни тасдиқламади.

«Ҳар бир ўйинда мен ғалаба қозонишимиз учун энг яхши имконият беради деб ҳисоблаган таркибимни танлайман. Менимча, Карвахаль ажойиб ўйин кўрсатди — у жуда хавфли бўлган Адемола Лукманни тўхтата олди. Трентга келсак, у кечроқ майдонга тушиб, жамоага қўшимча энергия бағишлади. Таркибимизда турли вариантлар борлигидан хурсандман. Кучли захира ўриндиғи жуда муҳим», — дея Арбелоанинг сўзларини келтиради Madrid Universal.

«Реал» Ла Лига турнир жадвалида иккинчи ўринда қолмоқда — «Барселона» билан орадаги фарқ тўрт очкони ташкил этади.