Машҳур собиқ футболчи Жейми Каррагер Англия лига кубоги финалида «Манчестер Сити»га қарши баҳсда Кепа Аррисабалагани майдонга туширишга қарор қилган «Арсенал» бош мураббийи Микель Артетага нисбатан билдирилаётган танқидларга қўшилди.
«Уэмбли»да кечган баҳсда «тўпчилар» 0:2 ҳисобида имкониятни бой беришди, Давид Райянинг ўринбосари эса гол билан якунланган хатога йўл қўйди.
«Артета Кепадан ҳеч нарса қарз эмас — у мухлислар учун охирги олти йил ичида биринчи совринни қўлга киритишнинг энг яхши имкониятини таъминлаб бериши керак эди. Гвардиола ва Траффорд билан боғлиқ вазият эса мутлақо бошқача: мураббий ундан қарздор, чунки Траффорд жамоага биринчи рақамли дарвозабон сифатида таклиф этилганди», — дея фикр билдирди Каррагер Sky Sports эфирида.
