Нуфузли италиялик журналист Фабрицио Романо «Милан» клуби Лука Модрични шартномасини яна бир мавсумга узайтиришга кўндириш учун қилаётган ҳаракатлари ҳақида янги тафсилотларни очиқлади. Унинг сўзларига кўра, «россонерилар» Модрични Чемпионлар лигасига қайтиш истиқболи билан қизиқтиришга уринмоқда.
«Бутун «Милан» айнан унга боғланиб қолган ва яна бир йил қолиши учун кўндиришга ҳаракат қилмоқда. Ҳамма Модричнинг Чемпионлар лигасида ўйнашини жуда хоҳлайди. Аммо у ҳозирча якуний қарорга келгани йўқ», — дея журналистнинг сўзларини келтиради pianetamilan.it.
Эслатиб ўтамиз, Лука Модрич ўтган йилнинг ёзида Мадриднинг «Реал» клубидан Италия жамоасига кўчиб ўтган эди. У янги чемпионатда дарҳол ўзини энг яхши томонлама кўрсата олди.
