«Реал» ярим ҳимоячиси Федерико Вальверде «Атлетико»га қарши кечган дербида (3:2) майдондан четлатилган эди. Уругвайлик футболчи Алекс Баэнанинг оёқларига зарба бергани учун ўқизил карточка олди.

Marca нашрининг хабар беришича, «Реал» Вальверденинг четлатилиши юзасидан апелляция беради. Мадридликларнинг аргументи шундан иборатки, агар ушбу вазиятда Вальверде эмас, балки бошқа футболчи иштирок этганида, қизил карточка кўрсатилмаган бўларди. «Қаймоқранглилар»нинг фикрича, Федериконинг майдондан ҳайдалиши унинг Баэна билан бўлган эски можаросига боғлиқ.

Бир неча йил олдин ўйиндан сўнг Вальверде Баэнани тўхташ жойида (парковкада) кутиб туриб, унга зарба берган эди. Федерико бу ишни рақибининг майдонда унинг оиласи шаънига айтган сўзлари туфайли амалга оширган. Ўшанда бу воқеа ҳақида ОАВда кенг ёзилган эди.