«Ланс» клуби «ПСЖ»нинг еврокубоклардаги иштироки муносабати билан мамлакат чемпионати доирасидаги ўйинни бошқа муддатга кўчириш ҳақидаги сўровига рад жавобини берди. Бу ҳақда RMC Sport нашри хабар тарқатмоқда.

Манба берган маълумотларга кўра, якуний қарор яқин кунларда LFP (Франция профессионал футбол лигаси) кенгашида қабул қилинади.

«ПСЖ» 8 апрель куни «Парк де Пренс» стадионида чорак финалнинг дастлабки учрашувида «Ливерпуль»ни қабул қилиши, сўнгра 14 апрель куни жавоб ўйини учун «Энфилд»га йўл олиши керак. «Ланс» билан ўйин эса 11 апрель санасига белгиланган.

Агар аввалроқ «Ланс» ушбу учрашувни кўчириш эҳтимолини инкор этмаган бўлса, эндиликда уларнинг позицияси кескинлашган. Жамоа 2 ҳафта давомида ўйинсиз қолишни ва якунда 7 кун ичида 3 та учрашувда майдонга тушишни истамаяпти.

Айни дамда «Ланс» ҳисобида 27 та ўйиндан сўнг 59 очко мавжуд ва жамоа 2-ўринни эгаллаб турибди. «ПСЖ» эса 28 та ўйинда 60 очко жамғарган ҳолда турнир жадвалида пешқадамлик қилмоқда.