«Lans» klubi «PSJ»ning yevrokuboklardagi ishtiroki munosabati bilan mamlakat chempionati doirasidagi o‘yinni boshqa muddatga ko‘chirish haqidagi so‘roviga rad javobini berdi. Bu haqda RMC Sport nashri xabar tarqatmoqda.
Manba bergan ma’lumotlarga ko‘ra, yakuniy qaror yaqin kunlarda LFP (Fransiya professional futbol ligasi) kengashida qabul qilinadi.
«PSJ» 8 aprel kuni «Park de Prens» stadionida chorak finalning dastlabki uchrashuvida «Liverpul»ni qabul qilishi, so‘ngra 14 aprel kuni javob o‘yini uchun «Enfild»ga yo‘l olishi kerak. «Lans» bilan o‘yin esa 11 aprel sanasiga belgilangan.
Agar avvalroq «Lans» ushbu uchrashuvni ko‘chirish ehtimolini inkor etmagan bo‘lsa, endilikda ularning pozisiyasi keskinlashgan. Jamoa 2 hafta davomida o‘yinsiz qolishni va yakunda 7 kun ichida 3 ta uchrashuvda maydonga tushishni istamayapti.
Ayni damda «Lans» hisobida 27 ta o‘yindan so‘ng 59 ochko mavjud va jamoa 2-o‘rinni egallab turibdi. «PSJ» esa 28 ta o‘yinda 60 ochko jamg‘argan holda turnir jadvalida peshqadamlik qilmoqda.
