«Реал» якшанба куни Ла Лига доирасида «Атлетико»га қарши кечган баҳсдаги (3:2) Федерико Вальверденинг четлатилиши юзасидан шикоят қилади.
Marca нашрининг хабар беришича, апелляция бериш шунчаки расмиятчилик бўлиб, клуб унинг муваффақият қозонишига унчалик ишонмаяпти. Ярим ҳимоячи иккита ўйинга дисквалификация қилиниши хавфи остида турибди.
«Реал»нинг фикрича, қизил карточка ҳакам Хосе Мунуэра Монтеронинг вазиятга субъектив ёндашуви билан боғлиқ. Мадридликларнинг қарашича, арбитрнинг қарорига Вальверде ва Баэна ўртасидаги муносабатлар таъсир кўрсатган: 2023 йилда уругвайлик футболчи автотураргоҳда испаниялик футболчининг юзига мушт туширгани ҳақида хабарлар тарқалган эди.
«Қаймоқранглилар»нинг ҳисоблашича, агар Вальверде якшанба куни худди шу услубдаги фолни Баэнага эмас, балки Кокега нисбатан ишлатганида, унга фақат сариқ карточка кўрсатилган бўларди.
Таъкидланишича, Федериконинг четлатилиши «Реал» томонидан Испаниядаги ҳакамлик тизими клуб манфаатларига зид ишлаётганининг навбатдаги исботи сифатида кўрилмоқда.
