«Барселона» вингери Ламин Ямал Ла Лига доирасида «Райо Вальекано»га қарши кечган баҳсда (1:0) алмаштирилганидан жуда норози бўлди. Испаниялик футболчи ўйиннинг 82-дақиқасида захирага олинди.

Майдонни тарк этар экан, Ямал бир неча бор: «Доим мен. Бу ақлсизлик», — дея такрорлади. Қайд этилишича, футболчи бош мураббий Ханси Флик томонга ҳатто қайрилиб ҳам қарамаган.

Захира ўриндиғида ҳам Ламин қўл ҳаракатлари билан майдон томонни кўрсатиб, ўз эътирозини давом эттирди. Якунда 18 ёшли ўйинчи учрашув тугашини кутмасдан, кийиниш хонасига йўл оладиган туннелга кириб кетди.