«Барселона» клуби «Интер» марказий ҳимоячиси Алессандро Бастонини сотиб олишни мақсад қилган. Бу ҳақда Diario SPORT нашри хабар бермоқда.
Манбанинг берган маълумотларига кўра, каталонияликлар Бастони узоқ йиллар давомида жамоа мудофаасининг етакчиси бўла олишига ишонмоқдалар. Клубдагилар «Интер» билан ҳимоячининг трансфери бўйича тахминан 60 миллион евро эвазига келишиб олиш мумкин деб ҳисоблашмоқда.
Жорий мавсумда 26 ёшли италиялик футболчи барча мусобақаларда 35 та ўйинда майдонга тушиб, иккита гол урди ва ўз ҳисобига олтита голли узатмани ёздириб қўйди.
Бастонининг «Интер» билан амалдаги шартномаси 2028 йилнинг ўрталарига қадар мўлжалланган. Transfermarkt экспертлари футболчининг бозор қийматини 80 миллион еврога баҳоламоқдалар.
