Франциянинг «ПСЖ» клуби ҳимоячиси Ашраф Ҳакимий Мадриднинг «Реал» клубига ўтишга қарор қилган. Бу ҳақда журналист Рамон Альварес де Мон ўзининг Х ижтимоий тармоғидаги саҳифасида хабар бермоқда.

Манбанинг маълумотларига кўра, 27 ёшли марокашлик ўнг қанот ҳимоячиси ўз яқинларига Мадрид клуби билан шартнома имзолаш учун қўлидан келган барча ишни қилишга тайёрлигини маълум қилган. Ҳакимий болалигидан «Реал»га мухлислик қилади ва «ПСЖ» билан амалдаги узоқ муддатли шартномаси бўлишига қарамай, жонажон клубига қайтишни истамоқда. Маълумот учун, Ҳакимий 2015 йилдан 2018 йилгача Мадрид клуби тизимида бўлган.

Ҳимоячининг трансфер қилиши учун яна бир сабаб бор — унинг энг яқин дўсти Килиан Мбаппе. Ҳужумчи бир неча бор Ҳакимий билан яна бирга ўйнаш истагини билдирган. Ўз навбатида, «ПСЖ» Ҳакимийни сотишни режалаштирмаяпти, бироқ агар футболчи кетишда қатъий туриб олса, клуб унинг трансферини кўриб чиқиши мумкин.

Ҳакимий 2021 йилда Миланнинг «Интер» клубидан 68 миллион евро эвазига «ПСЖ» сафига келиб қўшилган эди. Жорий мавсумда ҳимоячи парижликлар сафида 24 та ўйинда майдонга тушиб, учта гол урди ва еттита голли узатмани амалга оширди. Унинг клуб билан шартномаси 2029 йилгача амал қилади, Transfermarkt портали эса футболчининг бозор қийматини 80 миллион еврога баҳолаган.