Ҳужумчи Муҳаммад Салоҳ шу ёзда «Ливерпуль»ни тарк этади. Мисрлик футболчининг мерсисайдликлар сафидан кетиши ҳақида кеча расман эълон қилинди.

Испаниянинг «Бетис» клуби Салоҳни ўз жамоасида кўришга тайёрлигини билдирди. Клубнинг ижтимоий тармоқлардаги саҳифасида Салоҳ ва дарвозабон Адриан бирга тушган сурат эълон қилинди. Ҳозирда Адриан «Бетис» шарафини ҳимоя қилмоқда, аввалроқ эса у «Ливерпуль»да тўп сурган. Суратда Салоҳ ва Адриан елкасида мисрлик футболчининг фамилияси ва 11-рақам туширилган «Бетис» либосини ушлаб туришибди.

«Сўнгги рақс, Мо», — дейилади клуб постида.

Албатта, Салоҳнинг ҳақиқатан ҳам келаси ёзда «Бетис» футболчисига айланишини тасаввур қилиш жуда қийин. Маълумот учун, шу йилнинг июнь ойида мисрлик юлдуз 34 ёшни қарши олади.