Осиё футбол конфедерацияси (ОФК) 2027-йилги Осиё Кубоги финал босқичига қуръа ташлаш маросими қолдирилганини расман эълон қилди. Мазкур тадбир 2026-йилнинг 11 апрель куни Саудия Арабистони пойтахти Ар Риёд шаҳрида бўлиб ўтиши керак эди.

ОФК расмий сайтида берилган баёнотга кўра, ушбу қарор барча манфаатдор томонларнинг маросимда тўлиқ ва хавфсиз иштирок этишини таъминлаш мақсадида қабул қилинган. Конфедерация Саудия Арабистони ташкилий қўмитасига тайёргарлик учун миннатдорчилик билдирди ва аъзо ассоциацияларни вазиятни тўғри тушунишга чақирди.

Эслатиб ўтамиз, минтақадаги вазият 28 февраль куни АҚШ ва Исроилнинг Эронга қарши қўшма ҳарбий операцияси бошланиши ортидан кескинлашган эди. Эрон бунга жавобан АҚШнинг минтақадаги ҳарбий базаларига, шунингдек, Исроил, Қатар, БАА, Саудия Арабистони, Қувайт ва Баҳрайндаги қатор объектларга зарбалар берди. Айнан мана шу ҳарбий тўқнашувлар халқаро спорт тадбирларини режа асосида ўтказишга тўсқинлик қилмоқда.

Ҳозирча Осиё кубоги-2027 қуръаси қачон ўтказилиши ҳақида аниқ маълумот берилмаган. Мусобақанинг ўзи эса Саудия Арабистони майдонларида ўтиши режалаштирилган.