«Интер Майами» ҳужумчиси Луис Суарес жамоадоши Лионель Мессининг «Барселона»га бўлган муносабати ҳақида фикр билдирди.

Ўтмишда уругвайлик ва аргентиналик футболчилар «кўк-анорранглилар» сафида биргаликда тўп суришган. Суарес 2020 йилда, Месси эса бир йил ўтиб клубни тарк этган эди. Иккала ҳолатда ҳам хайрлашув жараёни анча зиддиятли кечган.

«Лео Месси «Барселона»нинг муваффақиятларидан хурсанд бўлади — у ҳам клуб мухлиси. Унинг қайтиши ва Лапорта билан ярашиши масаласига келсак, бу ҳақда унинг ўзидан сўраган маъқул. Бу унинг шахсий иши», — дея Суареснинг сўзларини келтиради Barca Universal.

Месси ва каталонияликлар президенти Жоан Лапорта ўртасидаги низо ҳалигача ўз ечимини топмаган. Эслатиб ўтамиз, яқинда Лапорта яна бир бор «Барселона» раҳбари этиб қайта сайланди.