Германия терма жамоаси бош мураббийи Юлиан Нагельсманн «Арсенал» ҳужумчиси Кай Хаверцнинг Швейцарияга қарши бўлажак ўртоқлик учрашувида асосий таркибда майдонга тушишини маълум қилди.
«Кай Хаверц учрашувни асосий таркибда бошлайди. У анча вақт сафдан чиқиб қолган эди, шу сабабли биз унга ўйин амалиёти бермоқчимиз. Унга ўйин ритмига қайтиб олиш жуда муҳим», — дея Нагельсманннинг сўзларини келтиради Bayern & Germany.
Жорий мавсумда 26 ёшли Хаверц барча мусобақаларда жами 14 та ўйинда иштирок этди. Унинг ҳисобида 3 та гол ва 2 та голли узатма мавжуд.
Швейцария ва Германия терма жамоалари ўртасидаги ўртоқлик учрашуви бугун, 27 март куни бўлиб ўтади. Ўйин Тошкент вақти билан соат 00:45 да (28 мартга ўтар кечаси) бошланиши режалаштирилган.
