Ливерпульнинг «Эвертон» клуби жамоада ижара асосида тўп сураётган 30 ёшли вингер Жек Грилишни таркибда сақлаб қолмоқчи.

The i Paper Sport нашрининг тасдиқлашича, «ирислар» Грилишнинг тўлиқ трансфери учун 23 миллион евро ажратишга тайёр. Аввалроқ футболчининг ўзи ҳам «Манчестер Сити»ни тарк этиб, доимий равишда «Эвертон» сафига ўтиш истагида эканлиги ҳақида хабарлар тарқалган эди.

Жорий мавсумда Грилиш барча мусобақаларда жами 22 та ўйинда майдонга тушиб, 2 та гол урди ва 6 та голли узатмани амалга оширди.

Нуфузли Transfermarkt портали маълумотларига кўра, англиялик футболчининг бозор қиймати айни дамда 25 миллион еврони ташкил этмоқда.