Вингер Рафинья Бразилия терма жамоасининг Францияга қарши ўртоқлик учрашувида жароҳат олди. «Барселона» расмий сайтида Рафиньянинг ўнг оёқ орқа мушак пайлари шикастлангани ҳақида маълумот пайдо бўлди. Тиббий кўрик Бразилия футбол конфедерацияси томонидан ўтказилди.
Рафинья «Барселона» ихтиёрига қайтади ва тикланиш жараёнини бошлайди. «Кўк-анорранглилар»нинг маълум қилишича, Рафиньянинг сафга қайтиши учун тахминан беш ҳафта вақт талаб этилади. Бу Ханс-Дитер Флик жамоаси учун жиддий зарба бўлди.
Шу тариқа, Рафинья фақат май ойи бошидагина сафга қайтиши мумкин. Бу эса бразилиялик футболчи Чемпионлар лигаси чорак финали доирасидаги «Атлетико»га қарши ҳар иккала баҳсни ва яна бир қатор ўйинларни аниқ ўтказиб юборишини англатади.
2025/2026 йилги мавсумда Рафинья 31 та ўйинда майдонга тушиб, ўз ҳисобига 19 та гол ва 8 та голли узатмани ёздириб қўйган эди.
