Аргентина терма жамоаси бош мураббийи Лионель Скалони ҳужумчи Хоакин Паничеллининг жароҳати ҳақида фикр билдирди.

Яқиндагина «Страсбург» форварди тиззасидаги хочсимон боғламлари узилиши сабабли Жаҳон чемпионатини ўтказиб юбориши маълум бўлган эди.

«Паничеллининг жароҳати бизга кучли эмоционал таъсир кўрсатди. Буни қабул қилиш осон бўлмади. Балки, бу ҳатто ўйинимизга ҳам таъсир қилгандир. Бу жуда маҳзун хабар, ҳеч кимга тилаб бўлмайдиган даҳшатли воқеа. Хоакин жуда яхши шуғулланаётган эди. Мен уни қўллаб-қувватлайман ва унга энг яхши тилакларимни билдираман», — деди Скалони Мавритания устидан қозонилган ғалабадан (2:1) кейинги матбуот анжуманида.

1 апрель куни «альбиселесте» иккинчи ўртоқлик учрашувини ўтказади — рақиб Замбия терма жамоаси бўлади.