Украина терма жамоаси ҳужумчиси Артём Довбик яқинлашиб келаётган трансфер ойнасида «Рома»ни тарк этиши мумкин. Италия клуби бир қатор футболчиларни, жумладан украиналик форвардни ҳам сотувга қўйишни режалаштирмоқда. La Gazzetta dello Sport нашрига таяниб Siamo la Roma хабар беришича, клуб раҳбарияти ҳужумчининг жорий мавсумдаги ўйинларидан норози.

«Рома» хайрлашмоқчи бўлган футболчилар қаторида Пауло Дибала, Зеки Челик, Лоренцо Пеллегрини ва Стефан Эл-Шааравилар бор. Шунингдек, клуб ижара асосида тўп сураётган Эван Фергюсон ва Костас Цимикас билан ҳам ҳамкорликни давом эттирмайди.

Эслатиб ўтамиз, ҳозирда Довбик жароҳатидан сўнг тикланиш жараёнини ўтамоқда. Ушбу мавсумда у Рим клуби сафида 17 та ўйинда майдонга тушиб, 3 та гол урди ва 2 та голли узатмани амалга оширди. Transfermarkt портали ҳужумчини 15 миллион еврога баҳоламоқда.