«Челси» ярим ҳимоячиси Энцо Фернандеснинг келажаги унинг севгилиси Валентина Сервантеснинг сўзларидан сўнг яна диққат марказига тушди, деб хабар бермоқда TopSkills.

Журналистлар билан суҳбат чоғида Сервантес бир нечта очиқ жавоблар берди ва бу аргентиналик футболчининг Лондон клубини тарк этиши мумкинлиги ҳақидаги муҳокамаларга сабаб бўлди.

Фернандеснинг «Челси»да қолиш-қолмаслиги ҳақидаги саволга у шундай жавоб берди: — «Билмадим, умид қиламанки, йўқ. Менга у ер ёқмайди».

Шунингдек, Валентина ярим ҳимоячининг қачондир Аргентинанинг «Ривер Плейт» клубига қайтиш истаги борлигини тасдиқлади. — «Ҳа, Энцо буни хоҳлайди. Қайсидир пайтда биз албатта қайтамиз», — деди у.

Бундан ташқари, ундан Мадридга кўчиб ўтиш эҳтимоли ҳақида ҳам сўрашди: — «Билмадим... Қаерга айтишса, ўша ерга болалар билан бирга бораман», — деб таъкидлади Сервантес.

Ушбу сўзлар фонида Испания ва Англия ОАВларида Фернандеснинг трансфери борасидаги гап-сўзлар яна авж олди. Аввалроқ 25 ёшли аргентиналикка бир нечта топ-клублар қизиқиш билдираётгани, Мадриднинг «Реал» клуби эса уни марказий чизиқни кучайтириш учун асосий номзодлардан бири сифатида кўраётгани хабар қилинган эди.

Манбаларга кўра, «қаймоқранглилар» турли хил келишув вариантларини, жумладан, футболчи алмаштириш ва қўшимча ҳақ тўлаш схемасини ўрганмоқдалар. «Челси»нинг беқарор натижалари ва еврокубоклардаги иштироки бундай миш-мишларнинг кўпайишига қўшимча омил бўлмоқда.

Энцо Фернандес 2023 йилнинг январидан бери Лондон клуби шарафини ҳимоя қилиб келмоқда. Шу вақт ичида у барча турнирларда 160 та ўйинда майдонга тушиб, 28 та гол ва 29 та голли узатмани амалга оширган. АПЛнинг жорий мавсумида эса унинг ҳисобида 8 та гол ва 3 та ассист бор.