“Ньюкасл” ва Англия терма жамоасининг собиқ ҳужумчиси Алан Ширер велосипедда ҳалокатга учради.

Қайд этилишича, собиқ футболчи йўл четидаги чуқурликка тушиб кетган. Ширер ўзининг ижтимоий тармоқдаги саҳифасида олган жароҳатлари акс этган суратни эълон қилди. Унинг қўли ва оёғи шикастланган, танасидаги шилинишлар эса ҳалокат анча жиддий бўлганидан далолат бермоқда. Ҳозирча ҳодисанинг аниқ тафсилотлари маълум эмас.

Маълумот учун, Ширер ўз фаолиятининг 10 йилини “Ньюкасл”га бағишлаган. У ушбу клуб сафида 404 та ўйинда майдонга тушиб, 206 та гол уришга эришган ва 2006-йилда фаолиятини якунлаган эди. Шунингдек, ҳужумчи Англия миллий терма жамоаси сафида жами 63 та баҳсда иштирок этиб, 30 та гол муаллифига айланган.

Алан Ширер Англия Премьер Лигаси тарихидаги энг яхши тўпурар ҳисобланади. У “Ньюкасл” ва “Блекбурн” клублари сафида 414 та баҳсда 260 та гол уришга муваффақ бўлган. Унинг энг яқин таъқибчиси Ҳарри Кейн ҳисобланади. Ҳозирда “Бавария” футболчиси ҳисобланган англиялик ҳужумчи ҳисобида 320 та ўйинда киритилган 213 та гол бор.

“Манчестер Сити” ҳужумчиси Эрлинг Ҳоланд 126 та ўйинда 107 та гол киритган.