“Сантос” ҳужумчиси Неймар АҚШ, Мексика ва Канада майдонларида бўлиб ўтадиган Жаҳон чемпионати учун Бразилия терма жамоасининг якуний таркибига кириш мақсадида кутилмаган қарор қабул қилди. Marca нашрининг хабар беришича, футболчи жорий йилнинг ёзига қадар жамоасининг меҳмондаги учрашувларида майдонга тушмасликка қарор қилган.

Неймарнинг бундай йўл тутишига ўтган йили олган оғир жароҳати қайталанишидан қўрқаётгани сабаб бўлмоқда. Шу тариқа, Неймар сафар ўйинларидаги жисмоний юкламаларни минималлаштириш орқали ўз соғлиғини асраб қолмоқчи.

Эндиликда Неймарда терма жамоа бош мураббийи Карло Анчелоттига ўзининг ҳали ҳам юқори савиядаги футболчи эканлигини исботлаш учун атиги еттита уй учрашуви қолди. Айнан шу ўйинлардаги ҳаракатлари унинг Жаҳон чемпионатига бориш ёки бормаслигини ҳал қилади.

Эслатиб ўтамиз, италиялик мутахассис Бразилия терма жамоасининг якуний қайдномасини 18 май куни эълон қилиши кутилмоқда. Аввалроқ Анчелотти юлдуз футболчини яқин орадаги ўртоқлик ўйинларига жалб этмагани спорт жамоатчилиги ўртасида турли муҳокама ва шубҳаларга сабаб бўлган эди.