Мадриднинг «Реал» клуби ярим ҳимоячиси Тьяго Питарч Марокаш терма жамоасида ўйнаш ҳуқуқига эга. Келиб чиқиши марокашлик бўлган испаниялик футболчи ҳозирча ўз қарорини расман эълон қилгани йўқ, бироқ яқинда «қизил фурия» устози Луис де ла Фуэнте истиқболли ярим ҳимоячи аллақачон Испания фойдасига танлов қилганини таъкидлаган эди.
Дарвозабон Яссин Буну эса, ўз навбатида, Марокаш миллий жамоаси ҳам Питарчни қабул қилишдан мамнун бўлишини билдирди.
«Унинг Марокашда ҳам, Испанияда ҳам қариндошлари бор. У ўзи тўғри деб ҳисоблаган ишни қилади, лекин шуни билсинки, биз уни терма жамоамизда хурсандчилик билан қабул қиламиз. Биз Марокашга алоқаси бўлган ҳар бир инсондан хурсанд бўламиз. Айниқса, агар у «Реал» футболчиси бўлса», — дея Madrid Xtra Бунунинг сўзларини келтиради.
Тьяго Питарч яқиндагина «қаймоқранглилар»нинг асосий таркибига киришни уддалади.
