Мадриднинг «Реал» клуби ва Франция терма жамоаси марказий ҳужумчиси Килиан Мбаппе ёзда бўлиб ўтадиган Жаҳон чемпионатидан кутаётган умидлари билан ўртоқлашди.
«Биз Жаҳон чемпионатида иштирок этиш нимани англатишини биламиз — бу жуда қийин. Биз улкан ҳиссий босимни ҳис қиляпмиз. Бутун мамлакатнинг умиди бизнинг елкамизда эканлигини тушуниб турибмиз. Биз 67 миллиондан ортиқ французлар учун майдонга тушамиз», — дея ҳужумчининг сўзларини келтиради FOX Deportes.
Мбаппе, шунингдек, Франция терма жамоаси мундиалга хотиржамлик билан ва чемпионлик кубогини қўлга киритиш ниятида яқинлашаётганини қўшимча қилди.
ЖЧ-2026 гуруҳ босқичида Дидье Дешам шогирдлари Норвегия ва Сенегал терма жамоаларига қарши баҳс олиб боришади. Французларнинг учинчи рақиби Ироқ ва Боливия ўртасидаги ўтиш ўйини натижасига кўра аниқланади.
