«Челси», «Арсенал» ва «Манчестер Сити» клублари «Комо» ярим ҳимоячиси Нико Пасга қизиқиш билдиришган эди, бироқ уларга футболчи кўриб чиқаётган ягона вариант — Мадриднинг «Реал» клубига қайтиш эканлиги маълум қилинди. «Қироллик клуби» келаётган ёзда футболчини қайта сотиб олиш ҳуқуқидан фойдаланади. Бу ҳақда Caught Offside нашри хабар бермоқда.

Манбанинг маълумотларига кўра, Испания гранди Пасга асосий жамоада муҳим рол ваъда қилган. «Реал» раҳбарияти 21 ёшли ярим ҳимоячи «жаҳон футболининг навбатдаги суперюлдузи»га айланишига ишонмоқда.

Аввалроқ, «қироллик клуби» футболчини 9 миллион евро эвазига қайта сотиб олиши ҳақида хабар берилган эди.

Пас 2016 йилдан 2024 йилгача «Реал» тизимида бўлган ва ўтган йили «Комо»га ўтган эди. Жорий мавсумда хавбек барча турнирларда 33 та ўйинда иштирок этиб, 11 та гол урди ва олтита голли узатмани амалга оширди. Transfermarkt портали тақдим этган маълумотларга кўра, футболчининг бозор қиймати ҳозирда 65 миллион еврони ташкил этади.