«Chelsi», «Arsenal» va «Manchester Siti» klublari «Komo» yarim himoyachisi Niko Pasga qiziqish bildirishgan edi, biroq ularga futbolchi ko‘rib chiqayotgan yagona variant — Madridning «Real» klubiga qaytish ekanligi ma’lum qilindi. «Qirollik klubi» kelayotgan yozda futbolchini qayta sotib olish huquqidan foydalanadi. Bu haqda Caught Offside nashri xabar bermoqda.

Manbaning ma’lumotlariga ko‘ra, Ispaniya grandi Pasga asosiy jamoada muhim rol va’da qilgan. «Real» rahbariyati 21 yoshli yarim himoyachi «jahon futbolining navbatdagi superyulduzi»ga aylanishiga ishonmoqda.

Avvalroq, «qirollik klubi» futbolchini 9 million yevro evaziga qayta sotib olishi haqida xabar berilgan edi.

Pas 2016 yildan 2024 yilgacha «Real» tizimida bo‘lgan va o‘tgan yili «Komo»ga o‘tgan edi. Joriy mavsumda xavbek barcha turnirlarda 33 ta o‘yinda ishtirok etib, 11 ta gol urdi va oltita golli uzatmani amalga oshirdi. Transfermarkt portali taqdim etgan ma’lumotlarga ko‘ra, futbolchining bozor qiymati hozirda 65 million yevroni tashkil etadi.