O‘zbekistonlik taniqli grossmeyster Nodirbek Abdusattorov “Lolazor” podkastiga bergan intervyusida bo‘lajak rafiqasi bilan qanday tanishib qolgani haqida so‘zlab berdi. Ularning ilk uchrashuvi bu yil Navro‘z bayrami munosabati bilan “Yangi O‘zbekiston” bog‘ida o‘tkazilgan tadbirda bo‘lib o‘tgan.
Shaxmatchining aytishicha, u bayramga sportchi sifatida taklif etilgan, bo‘lajak rafiqasi esa kimyo sohasi vakili sifatida qatnashgan. Ular tasodifan yonma-yon o‘tirib qolgan va shu tariqa tanishib ketgan.
“Tanishishimiz juda qiziq bo‘lgan. Tadbirda tasodifan yonma-yon o‘tirib qolganmiz. O‘sha yerda suhbatlashib, tanishib oldik. Eng qizig‘i, xavfsizlik qoidalariga ko‘ra, tadbirga telefon olib kirish mumkin emas edi. Barcha aloqa vositalarini tashqarida qoldirgandik. Shuning uchun konsert tugagach, qaytishda avtobusda bir amallab uning telefon raqamini olib qolganman”, deya tabassum bilan eslaydi Nodirbek.
Ma’lumot uchun, Nodirbek Abdusattorov o‘zbek shaxmatining eng taniqli vakillaridan biri. U 2022 yilda Hindistonning Chennay shahrida o‘tkazilgan Butunjahon shaxmat olimpiadasida O‘zbekiston terma jamoasi bilan oltin medalni qo‘lga kiritgan. Jamoa oradan to‘rt yil o‘tib, Samarqandda tashkil etilgan 46-Butunjahon shaxmat olimpiadasida ham chempionlikni takrorlagan.
Shuningdek, Abdusattorov Samarqanddagi musobaqada birinchi taxtada ham oltin medalga sazovor bo‘ldi.
