Англия Премьер-лигаси (АПЛ) клублари ишқибозларининг тўртдан уч қисми ВАР (VAR) тизимидан фойдаланишга қарши чиқишди. Англия футбол мухлислари ассоциацияси томонидан ўтказилган сўровнома натижалари шуни кўрсатмоқда.

Ушбу сўровномада қарийб 8000 нафар мухлис иштирок этди. Уларнинг ярмидан кўпи жорий мавсумда ўз жамоаларининг камида 15 та уй учрашувига ташриф буюрган ашаддий ишқибозлардир.

Респондентларнинг 97 фоизи «ВАР футбол томоша қилишни янада ёқимли қилади» деган фикрга қарши чиқишди. 90 фоиздан ортиғи эса ушбу тизимнинг ишлаши стадионга ташриф буюришдан олинадиган таассуротларни яхшилаганига қўшилишмади.

«Футболда ВАР тизимидан фойдаланишни қўллаб-қувватлайсизми?» деган саволга иштирокчиларнинг 75,71 фоизи «йўқ» деб жавоб берди. Шу билан бирга, 70 фоиздан кўпроқ мухлис ушбу тизим ҳакамлик қарорларининг умумий аниқлигини оширганига ишонмайди.