Европа Иттифоқининг тезкор ҳаракат қилиш кучлари (EUFOR) таркибидаги италиялик аскар Босния ва Герцеговина терма жамоасининг машғулотини видеога олаётган вақтда қўлга тушди. Бу ҳақда Sportsport.ba нашри хабар бермоқда. 31 март куни ЖЧ-2026 саралашининг плей-офф босқичи финалида Босния ва Италия терма жамоалари ўзаро тўқнаш келишади.
Нашрнинг маълумотига кўра, ҳарбий хизматчи Болқон жамоасининг машғулоти пайтида тўсиқ ёнига келиб, содир бўлаётган жараённи телефонга муҳрлай бошлаган. Италиялик аскар зудлик билан пайқаб қолинган ва тўхтатилган. Кейинчалик Босния ва Герцеговина футбол ассоциацияси EUFOR миссиясига расмий шикоят йўллади.
Эслатиб ўтамиз, плей-офф босқичининг ярим финалида Италия терма жамоаси Шимолий Ирландияни 2:0 ҳисобида мағлуб этган эди. Босния ва Герцеговина эса Уэльс устидан зафар қучган (асосий вақт — 1:1, пенальтилар сериясида — 4:2).
