"Челси" ҳимоячиси Марк Кукурелья Энцо Маресканинг бош мураббийлик лавозимидан озод этилиши ҳақида ўз фикрларини билдирди. Лондонликлар италиялик мутахассисни шу йилнинг январь ойида истеъфога чиқаришган эди. Унинг ўрнини Лиам Россеньор эгаллади.
"Энцо Мареска билан ўзимизни барқарорроқ ҳис қилардик, чунки биз 18 ой давомида бирга ишладик. Агар у билан ўтказган илк мавсум олди тайёргарлигимизга қарасангиз, шубҳалар бор эди (ўшанда "Челси" 6 та ўртоқлик учрашувидан фақат биттасида ғалаба қозонган).
Ҳар бир футболчи нима қилиш кераклигини тушуниши учун муайян жараён зарур. Мареска билан ишлаган сўнгги ойларимизда деярли "автомат" тарзида ўйнай бошлагандик. Агар тизимни ўзгартирсак ҳам, нима қилиш кераклигини билардик. Бунинг учун вақт керак.
Ҳар бир соврин учун курашаётган "Арсенал"га қаранг. Улар Микель Артета билан деярли етти йилдан бери ишлашмоқда ва ҳали кўп нарса ютишмади. Аммо лойиҳага бўлган ишонч ўз мевасини бермоқда.
Биз Мареска биздан нима хоҳлаётганини билардик. Клублар ўртасидаги жаҳон чемпионатида қозонилган ғалаба ҳам ёрдам берди, бу жамоадаги алоқаларни мустаҳкамлайди. Қачонки мураббий сенга ишонч билдирса ва совринлар учун курашиш имкониятини берса, сен у учун жонингни беришга тайёр бўласан. Шу сабабли Маресканинг истеъфоси бизга қаттиқ таъсир қилди. Клуб шундай қарорга келди, лекин мендан сўрашганда, бундай қилмаган бўлардим.
Бундай ўзгаришлар билан мавсум охиригача кутган маъқул. Бу футболчилар ва янги мураббийга тайёргарлик кўриш, тўлиқ мавсум олди йиғинини ўтказиш учун вақт беради", — деди Марк Кукурелья.
