"Chelsi" himoyachisi Mark Kukurelya Enso Mareskaning bosh murabbiylik lavozimidan ozod etilishi haqida o‘z fikrlarini bildirdi. Londonliklar italiyalik mutaxassisni shu yilning yanvar oyida iste’foga chiqarishgan edi. Uning o‘rnini Liam Rossenyor egalladi.

"Enso Mareska bilan o‘zimizni barqarorroq his qilardik, chunki biz 18 oy davomida birga ishladik. Agar u bilan o‘tkazgan ilk mavsum oldi tayyorgarligimizga qarasangiz, shubhalar bor edi (o‘shanda "Chelsi" 6 ta o‘rtoqlik uchrashuvidan faqat bittasida g‘alaba qozongan).

Har bir futbolchi nima qilish kerakligini tushunishi uchun muayyan jarayon zarur. Mareska bilan ishlagan so‘nggi oylarimizda deyarli "avtomat" tarzida o‘ynay boshlagandik. Agar tizimni o‘zgartirsak ham, nima qilish kerakligini bilardik. Buning uchun vaqt kerak.

Har bir sovrin uchun kurashayotgan "Arsenal"ga qarang. Ular Mikel Arteta bilan deyarli yetti yildan beri ishlashmoqda va hali ko‘p narsa yutishmadi. Ammo loyihaga bo‘lgan ishonch o‘z mevasini bermoqda.

Biz Mareska bizdan nima xohlayotganini bilardik. Klublar o‘rtasidagi jahon chempionatida qozonilgan g‘alaba ham yordam berdi, bu jamoadagi aloqalarni mustahkamlaydi. Qachonki murabbiy senga ishonch bildirsa va sovrinlar uchun kurashish imkoniyatini bersa, sen u uchun joningni berishga tayyor bo‘lasan. Shu sababli Mareskaning iste’fosi bizga qattiq ta’sir qildi. Klub shunday qarorga keldi, lekin mendan so‘rashganda, bunday qilmagan bo‘lardim.

Bunday o‘zgarishlar bilan mavsum oxirigacha kutgan ma’qul. Bu futbolchilar va yangi murabbiyga tayyorgarlik ko‘rish, to‘liq mavsum oldi yig‘inini o‘tkazish uchun vaqt beradi", — dedi Mark Kukurelya.