"Тоттенхэм" клуби ўз расмий сайтида Роберто Де Дзерби жамоа бош мураббийи этиб тайинланганини эълон қилди. Мутахассис билан узоқ муддатли шартнома имзолангани таъкидланмоқда.

Аввалроқ ОАВда 46 ёшли мураббий беш йилга мўлжалланган меҳнат шартномасига қўл қўйиши ҳақида хабарлар тарқалган эди.

Италиялик мутахассис бунга қадар Англия Премьер-лигасида "Брайтон" жамоасини бошқарган. Де Дзербининг охирги иш жойи Франциянинг "Марсель" клуби бўлиб, у ерни 2026 йилнинг февраль ойида тарк этган эди. Бундан ташқари, у "Шахтёр", "Сассуоло", "Беневенто" ва "Палермо" жамоаларида ишлаш тажрибасига эга.

Эслатиб ўтамиз, 29 март куни "Тоттенхэм" шу йилнинг 14 февралида тайинланган мураббий Игор Тудорни истеъфога чиқарган эди. Тудор 2025/2026 йилги мавсумда жамоани бошқарган учинчи мутахассис бўлди. Бунгача клуб даниялик Томас Франк ва австралиялик Ангелос Постекоглу билан хайрлашган эди.