Словениялик дарвозабон Ян Облак ўзининг ҳозирги клуби — Мадриднинг «Атлетико» жамоасини тарк этиш ва фаолиятини Яқин Шарқда давом эттириш ниятида. Бу ҳақда El Chiringuito нашри хабар бермоқда.

Манба берган маълумотларга кўра, 33 ёшли посбонда Саудия Арабистони чемпионатига ўтиш варианти бор. Облак «матрасчилар» раҳбарияти билан шартномасида кўрсатилган 120 миллион евролик товон пулини камайтириш бўйича музокара олиб боришга ҳаракат қилмоқда.

Ян Мадрид жамоаси шарафини 2014 йилнинг ёзидан буён ҳимоя қилиб келади. Томонлар ўртасидаги амалдаги меҳнат шартномаси 2028 йилнинг июнь ойи охирида ниҳоясига етади.

Ла Лиганинг жорий мавсумида дарвозабон 26 та ўйинда майдонга тушиб, ўз дарвозасидан 25 та тўп олиб чиқди.