Аргентина терма жамоаси бош мураббийи Лионель Скалони ўз шогирдларининг бўшашишига асло йўл қўймаслигини маълум қилди.

«Альбиселесте» ўртоқлик учрашувида Замбия терма жамоасини мағлубиятга учратди (5:0). Баҳс якунлангач, амалдаги жаҳон чемпионлари устози тўғри руҳий тайёргарлик нақадар муҳимлигини эслатиб ўтди.

«Бизга жуда кўп нарса берган футболчилар бор, аммо улар шу руҳда давом этишлари керак. Терма жамоада ўйнаш учун юз фоиз тайёр бўлиш талаб этилади. Бу ерда бўшашишга ва таркибдан жой кафолатланган деб ўйлашга ҳаққингиз йўқ. Мавритания билан ўйинда содир бўлган воқеа бошқа қайтарилмаслиги керак. Сиз яхши ёки ёмон ўйнашингиз мумкин, лекин айрим нарсаларга асло йўл қўйиб бўлмайди. Футболчилар ўзаро гаплашиб олишди ва ҳаммасини тушунишди. Бугунги иштирокдан кўнглим тўлди», — дея Скалонининг сўзларини келтирмоқда AlbicelesteTalk.

Эслатиб ўтамиз, ЖЧ-2026 гуруҳ босқичида аргентиналиклар Жазоир, Австрия ва Иордания терма жамоаларига қарши баҳс олиб боришади.