Франция футбол федерацияси (FFF) раҳбари Филипп Диалло миллий терма жамоанинг бўлажак мураббийи ҳақидаги саволга жавоб беришдан бош тортди.

Аввалроқ FFF раҳбари ЖЧ-2026 дан кейин ўз лавозимини тарк этадиган Дидье Дешамнинг ўрнини ким эгаллашини билишини айтган эди. Хабарларга кўра, федерация Зинедин Зидан билан оғзаки келишувга эришган.

"Бош мураббий мавзусида бошқа фикр билдирмайман. Мен аллақачон ҳамма гапни айтдим, муддатни белгиладим ва номзоднинг профилини тахминан тасвирлаб бердим. Энди бу масалани қайта муҳокама қилиш учун Жаҳон чемпионати тугашини кутиш керак", — дея Диаллонинг сўзларини келтиради RMC Sport.

2026 йилги Жаҳон чемпионатида Франция терма жамоаси Сенегал, Норвегия ва кейинроқ аниқланадиган яна бир жамоа билан бир гуруҳдан жой олган.