Швеция терма жамоаси бош мураббийи Грэм Поттер ўз шогирдларининг жаҳон чемпионатига йўлланма олгани борасидаги фикрлари билан ўртоқлашди. Ҳал қилувчи ўтиш (плей-офф) ўйинида Швеция Польшани 3:2 ҳисобида мағлуб этди.
«Ажойиб оқшом. Бу катта шараф ва беқиёс тажриба! Драмаларга бой ўйин бўлди, ҳиссиётларни ва тикилган мақсад нақадар муҳимлигини назорат қилиш жуда қийин кечди», — дея мураббийнинг сўзларини келтирмоқда УЕФА расмий сайти.
Шунингдек, 2025 йилнинг октябрь ойида жамоа жиловини ўз қўлига олган Поттер шуни таъкидладики, терма жамоада иқтидорли футболчилар етарли бўлса-да, дастлаб муваффақиятга эришиш учун бунинг ўзи камлик қилган, чунки жамоа яхлит бир бутунликка айлана олмаган эди.
Жаҳон чемпионатида Швеция "F" гуруҳида Тунис, Нидерландия ва Япония терма жамоалари билан куч синашади.
