«Барселона» президенти Жоан Лапорта клубнинг трансфер бозоридаги устувор режалари ҳақида тўхталиб ўтди.

«Биз шунчаки трансфер қилиш учунгина ўйинчи сотиб олмаслигимиз керак — бизга фақат жамоа учун ҳақиқатда зарур бўлган футболчилар керак. Биз рақобатбардош таркиб шакллантиришга улгурдик, шу боис ҳозирги асосий вазифамиз — таркибни доимий равишда ўзгартириш эмас, балки мавжуд ресурсларни сақлаб қолиш ва уларни аста-секин кучайтириб боришдан иборат», — дея Лапортанинг сўзларини келтиради Barca Universal.

Каталония гранди кўплаб қимматбаҳо футболчиларга қизиқиш билдираётгани айтилмоқда. Улар орасида Мадриднинг «Атлетико» клуби ҳужумчиси Хулиан Альварес ва Миланнинг «Интер» жамоаси марказий ҳимоячиси Алессандро Бастони номлари тез-тез тилга олинмоқда.