«Барселона» бош мураббийи Ханс-Дитер Флик ярим ҳимоячи Томми Маркесни биринчи жамоага жалб этишни режалаштирмоқда.
Каталония гранди устози 19 ёшли футболчига кейинги мавсумда асосий таркибга ўтказилишини шахсан маълум қилган. Бу ҳақда Diario AS нашри хабар бермоқда. Ҳозирга келиб истиқболли ярим ҳимоячи «кўк-анорранглилар»нинг асосий жамоасида фақат битта ўйин ўтказган: у февраль ойида Ла Лиги доирасидаги «Мальорка»га қарши баҳснинг сўнгги дақиқаларида захирадан майдонга тушиб, дебютини нишонлаган эди.
Томми Маркеснинг «Барселона» билан шартномаси 2028 йилгача мўлжалланган. Флик ушбу испаниялик футболчини дебютидан сўнг «Френки де Йонгнинг кичик укаси» деб атаган эди.
