"ПСЖ" бош мураббийи Луис Энрике Чемпионлар лигаси чорак финали доирасидаги «Ливерпуль»га қарши кечадиган муҳим баҳс олдидан жамоа вингери Брэдли Барколанинг ҳолати ҳақида тўхталди.

Эслатиб ўтамиз, истеъдодли футболчи «Челси»га қарши ўйинда тўпиғидан жароҳат олган эди. Келаси ҳафтада бўлиб ўтадиган тўқнашув олдидан «Лучо» вазиятга қуйидагича баҳо берди:

«Билмайман, ҳозирча аниқ маълумот бера олмайман. У билан гаплашганимда фақат ўзини қандай ҳис қилаётгани ва фикрлари билан қизиқаман, холос. Ҳеч қандай муайянлик йўқ. Биз шошилмаяпмиз. Энг муҳими — унинг тўлиқ ва сифатли тикланиши. Қачон тайёр бўлишини эса кутишга мажбурмиз».

Бир қатор манбаларнинг таъкидлашича, Барколанинг тикланиш жараёни кутилганидан тезроқ кечмоқда. Бироқ Париж клуби раҳбарияти ва тиббий штаби футболчининг жисмоний ҳолати борасидаги маълумотларни сир сақлашга уринмоқда.

Франциялик вингернинг «Энфилд»даги баҳсда иштирок этиши ёки этмаслиги ўйин кунигача сўроқ остида қолиши мумкин.