"PSJ" bosh murabbiyi Luis Enrike Chempionlar ligasi chorak finali doirasidagi «Liverpul»ga qarshi kechadigan muhim bahs oldidan jamoa vingeri Bredli Barkolaning holati haqida to‘xtaldi.

Eslatib o‘tamiz, iste’dodli futbolchi «Chelsi»ga qarshi o‘yinda to‘pig‘idan jarohat olgan edi. Kelasi haftada bo‘lib o‘tadigan to‘qnashuv oldidan «Lucho» vaziyatga quyidagicha baho berdi:

«Bilmayman, hozircha aniq ma’lumot bera olmayman. U bilan gaplashganimda faqat o‘zini qanday his qilayotgani va fikrlari bilan qiziqaman, xolos. Hech qanday muayyanlik yo‘q. Biz shoshilmayapmiz. Eng muhimi — uning to‘liq va sifatli tiklanishi. Qachon tayyor bo‘lishini esa kutishga majburmiz».

Bir qator manbalarning ta’kidlashicha, Barkolaning tiklanish jarayoni kutilganidan tezroq kechmoqda. Biroq Parij klubi rahbariyati va tibbiy shtabi futbolchining jismoniy holati borasidagi ma’lumotlarni sir saqlashga urinmoqda.

Fransiyalik vingerning «Enfild»dagi bahsda ishtirok etishi yoki etmasligi o‘yin kunigacha so‘roq ostida qolishi mumkin.