Халқаро футбол федерацияси (FIFA) техник носозликлар туфайли тўхтаб қолган сотувлар қайта тиклангач, 2026 йилги жаҳон чемпионати финали учун чипталар нархини сезиларли даражада оширди. Бу ҳақда Associated Press агентлиги хабар берди.
Қуръа ташлаш маросимидан сўнг, декабрь ойида финал ўйини учун энг қиммат чипталар 8 680 доллар этиб белгиланган эди. Янгиланган нархларга кўра, 19 июль куни АҚШнинг Ист-Ратерфорд шаҳрида бўлиб ўтадиган финал баҳси учун максимал нарх 10 990 долларга етди.
Шунингдек, бошқа тоифадаги чипталар нархи ҳам кўтарилган:
2-тоифа: 5 575 доллардан 7 380 долларгача;
3-тоифа: 4 185 доллардан 5 785 долларгача ошган.
11 июнь куни Мехикода ўтказиладиган Мексика ва ЖАР терма жамоалари ўртасидаги очилиш ўйини чипталари эса 2 985 доллардан (аввал 2 355 доллар эди) сотилмоқда.
Европа футбол мухлислари ассоциацияси (FSE) ушбу нархларни “товламачилик” деб атади ва чипталар сотувини зудлик билан тўхтатишга чақирди. Ташкилот Европа истеъмолчилар ҳуқуқларини ҳимоя қилиш гуруҳи билан биргаликда FIFA устидан Еврокомиссияга шикоят йўллаган. Шикоятда ташкилот чипталар савдосидаги монополиядан суиистеъмол қилаётгани таъкидланган.
FIFA ҳозирча бешинчи босқич доирасида барча 104 та ўйин учун чипталар тўлиқ чиқарилмагани, улар босқичма-босқич сотувга қўйилишини маълум қилди.
Эслатиб ўтамиз, ЖЧ—2026 тарихда илк бор 48 та жамоа иштирокида ва учта давлат (АҚШ, Канада, Мексика) ҳудудида бўлиб ўтади. Мусобақа 11 июндан 19 июлга қадар давом этади.
