Ҳужумчи Килиан Мбаппе кескин танқидларга дуч келди. Франция терма жамоасининг юлдуз футболчиси ярим ҳимоячи Н’Голо Кантега нисбатан қилган иши учун ижтимоий тармоқларда мухлислар томонидан кескин қораланмоқда.
Колумбияга қарши кечган учрашувнинг 78-дақиқасида захирадан майдонга тушаётган Мбаппе ишора орқали Райан Шеркидан сардорлик боғичини Кантедан олиб беришни сўраган. Шерки Килианнинг кўрсатмасини бажариб, боғични унга олиб келиб берган.
Мухлисларнинг фикрича, Мбаппе Кантега ўйинни сардор сифатида якунлашига имкон бериши керак эди. Боиси, Н’Голо ўша куни ўз туғилган кунида — 35 ёшга тўлган кунида «уч ранглилар»ни майдонга сардор сифатида бошлаб тушган эди.
Ўтган ҳафтада Франция терма жамоаси Колумбияни 3:1 ҳисобида мағлуб этганди. Мбаппенинг сардорлик боғичи борасидаги кўрсатмаси билан боғлиқ эпизод эса энди муҳокамаларга сабаб бўлмоқда.
