Лондоннинг «Арсенал» клуби собиқ ҳужумчиси Тьерри Анри ярим ҳимоячи Мартин Субимендини қўллаб-қувватлади.
Франциялик афсона «канонирлар» сафида Англиядаги дебют мавсумини ўтказаётган испаниялик ярим ҳимоячи шаънига айтилаётган танқидларни ёқламаяпти.
«Одамлар ҳаммани муҳокама қилишни ва танқид қилишни яхши кўришади. Ҳар доим шубҳа билан қараш мумкин, лекин Субименди бу лигага яқиндагина келиб қўшилди. Эсимда, Родри [«Манчестер Сити»га] илк бор ўтганида, унга ҳам шубҳа билан қарашганди. Мен ўзим ҳам буни бошдан кечирганман, шунинг учун шуни биламанки, шунчаки танқидларни қабул қилиш ва охир-оқибат барча шубҳаларни йўққа чиқариш учун бор кучни ишга солиш керак», — дея Arsenal Radar Анрининг сўзларини келтирмоқда.
Мартин Субименди ўтган йилнинг ёзида «Реал Сосьедад»дан «Арсенал»га 70 миллион евро эвазига кўчиб ўтган эди.
