“Сантос” клуби ҳужумчиси Неймар Карло Анчелотти томонидан 2026 йилги Жаҳон чемпионати учун Бразилия терма жамоасининг якуний рўйхатига киритилмади.

Ушбу маълумот Милан шаҳрида ўтказилган италиялик собиқ мураббий Арриго Саккининг 80 йиллик юбилейида иштирок этган бразилиялик журналист Лаэрсио Рома томонидан сиздирилган.

Қайд этилишича, тадбир давомида Саккига шахсан Анчелоттининг ўзи қўнғироқ қилиб уни табриклаган.

Стол атрофидагилар жумладан, Газзетта делло Спорт журналисти ҳам Анчелоттининг Бразилиядаги ишидан жуда мамнун эканлиги, бироқ Неймар атрофидаги улкан баҳс-мунозараларни тушунмаётгани ҳақидаги сўзларини эшитишган.

Ҳар иккала мураббий ҳам ҳужумчининг терма жамоадаги вақти аллақачон ўтиб бўлган, деган фикрда якдил экани маълум бўлган.

Аввалроқ тарқалган хабарларга кўра, ҳозирда 2026 йилги Жаҳон чемпионати учун Бразилия миллий жамоаси қайдномасидаги икки бўш ўринга уч нафар номзод борлиги маълум бўлган эди.

ESPN нашри хабарига кўра, жамоа бош мураббийи Карло Анчелотти 26 кишилик рўйхат учун 24 нафар ўйинчини аллақачон танлаб бўлган. Фақат бирор футболчининг жароҳати сабабли рўйхат ўзгариши мумкин.

Манбага кўра, ярим ҳимоячи Лукас Пакета (“Фламенго”) ҳамда ҳужумчилар Эндрик (“Лион”) ва Игор Тиаго (“Брентфорд”) мундиалда иштирок этиши мумкин.

Дарвозабонлар:
Алиссон (“Ливерпуль”)
Эдерсон (“Фенербахтче”)
Бенту (“Ал-Насср”)

Ҳимоячилар:
Маркиньос (ПСЖ)
Габриэль Магаляеш (“Арсенал”)
Эдер Милитао (“Реал”)
Уэсли (“Рома”)
Данило (“Фламенго”)
Алекс Сандро (“Фламенго”)
Лео Перейра (“Фламенго”)
Бремер (“Ювентус”)
Дуглас Сантос (“Зенит”)

Ярим ҳимоячилар:
Каземиро (“Манчестер Юнайтед”)
Бруно Гимарайнш (“Ньюкасл”)
Фабиньо (“Ал-Иттиҳод”)
Андрей Сантос (“Челси”)
Данило Сантос (“Ботафого”)

Ҳужумчилар:
Эстевао (“Челси”)
Винисиус Жуниор (“Реал”)
Матеус Куня (“Манчестер Юнайтед”)
Луис Энрике (“Зенит”)
Габриэль Мартинелли (“Арсенал”)
Жоао Педро (“Челси”)
Рафинья (“Барселона”)

Италиялик мутахассис дарвозабонлар ва ҳимоячилар рўйхатини тасдиқлаб бўлган, аммо яна икки нафар ҳужумчини чақириш ёки бир нафар ҳужумчи ҳамда бир нафар ярим ҳимоячи танлаш борасида ҳали қарорга келмаган.