Мадриднинг «Реал» клуби бош мураббийи Альваро Арбелоа чап қанот ҳимоячиси позицияси учун асосий танлов борасида ҳали бир қарорга келмади.
Асосий таркибдан жой олиш учун Фран Гарсия, Альваро Каррерас ва Ферлан Менди ўзаро рақобатлашмоқда. Marca нашрининг хабар беришича, испаниялик мутахассис ушбу уч футболчидан исталганига ишонишга тайёр — унда яққол фаворит йўқ. Мавсумнинг ҳал қилувчи қисмида ҳар учала ўйинчи ҳам асосий таркибда синаб кўрилиши кутилмоқда.
Тахминларга кўра, Ла Лиганинг бугунги «Мальорка»га қарши баҳсида «қаймоқранглилар»нинг асосий таркибида Каррерас майдонга тушади. Учрашув Тошкент вақти билан соат 19:15 да бошланади.
Эслатиб ўтамиз, Альваро Арбелоа январь ойида Хаби Алонсонинг ўрнини эгаллаб, бош мураббий лавозимига тайинланган эди.
