Лондоннинг «Арсенал» клуби бош мураббийи Микель Артета Англия Кубогидан чиқиб кетгандан сўнг, жамоада ўзгаришлар қилиш зарурияти ҳақидаги саволга жавоб берди.

«Тўпчилар» мусобақанинг чорак финалида «Саутгемптон»га (1:2) имкониятни бой беришди. Журналистлар Лондон гранди устозидан ёзги трансфер ойнасида жамоани кучайтириш эҳтимоли ҳақида фикр билдиришини сўрашди.

«Мен ўз футболчиларимни яхши кўраман. Улар шу тўққиз ой давомида ўзларини аямай, қаттиқ меҳнат қилишди. Ҳатто баъзилари бугун, умуман олганда, майдонда бўлмасликлари ҳам мумкин эди (жароҳат ёки чарчоқ назарда тутилмоқда). Мен футболчиларимизни ҳар қачонгидан ҳам кўпроқ ҳимоя қиламан. Агар кимдир масъулиятни ўз бўйнига олиши керак бўлса, бу — менман. Мавсум давомида доим қийин даврлар бўлиб туради. Олдинда бизни ҳал қилувчи босқич ва муҳим ўйинлар кутмоқда — биз олдинга интилишимиз ва аввалги ишларимизни давом эттиришимиз керак», — деди Артета матбуот анжуманида.

Сешанба куни «Арсенал» Чемпионлар Лигаси чорак финали доирасида Лиссабоннинг «Спортинг» жамоаси билан куч синашади.