Шанба куни «Барселона» Мадриднинг «Реал» клуби йўл қўйган хатодан унумли фойдаланди ва Ла Лига чемпионлик пойгасидаги фарқни ошириб олди.

«Қаймоқранглилар» «Мальорка»га (1:2) имкониятни бой беришди. Кейинроқ «кўк-анорранглилар» худди шундай ҳисобда «Атлетико»дан устун келишди. Учрашув якунлангач, журналистлар каталонияликлар устози Ханс-Дитер Фликдан «Реал»нинг мағлубияти ҳақида нима деб ўйлашини сўрашди, бироқ немис мутахассиси бунга совуққонлик билан жавоб қайтарди.

«Мен сизларга аллақачон айтганман — бу менга қизиқ эмас! Бошқа жамоалар мени ташвишга солмайди», — деди немис мураббийи матбуот анжуманида.

30-турдан сўнг «Барселона» «Реал»дан етти очкога ўзиб кетди. 8 апрель куни Флик жамоаси яна «матрасчилар» билан тўқнаш келади — бу сафар ўз уйида ва Чемпионлар Лигаси доирасида.