Миланнинг «Интер» клуби бош мураббийи Кристиан Киву мавсумнинг якуний ўйинларида жамоанинг руҳий ҳолати билан боғлиқ юзага келиши мумкин бўлган муаммолар ҳақидаги саволга жавоб берди.
Журналистлар руминиялик мутахассисдан «нерадзуррилар» таркибидаги Италия терма жамоаси аъзолари «Скуадра Адзурра»нинг Жаҳон чемпионатига чиқа олмаганидан кейин тез фурсатда ўзига кела олмасликларидан хавотирда эмасми, деб сўрашди.
«Мен чемпионлар билан ишлайман. Улар жорий мавсумдаёқ тўғри хулоса чиқариш ва муваффақиятсизликларни енгиб ўтишга қодир эканликларини исботлаб бўлишди. Улар асосийси — реакция, характер, жамоа ва мухлисларга бўлган ҳурмат эканини тушуниб етишган. Руҳий тушкунлик — ўйиннинг бир қисми, баъзида бу билан шунчаки келишиш керак. Мен бундан хавотирда эмасман. Футболчиларимиз ўзларининг иродавий барқарорликларида муаммо йўқлигини кўрсатиб қўйишди», — деди Киву матбуот анжуманида.
Бугун миланликлар ўз уйларида «Рома»ни қабул қилишади.
