«Манчестер Юнайтед» ва Португалия терма жамоаси юлдуз ярим ҳимоячиси Бруну Фернандеш Саудия Арабистони чемпионатида «Ан-Наср» шарафини ҳимоя қилаётган ҳамюрти Криштиану Роналдуга бўлган муносабати ҳақида гапириб берди.
«Криштиану мен учун намунадир. У «қизил иблислар» сафида тўп сурган вақтида «Олтин тўп»ни қўлга киритган. Роналду клубга қайтган кунни ҳамма эслаб қолади. Бу унутилмас лаҳза эди. Ўшанда «Олд Траффорд»да ажойиб муҳит ҳукм сурганди», — дея португалиялик футболчининг сўзларини келтиради ESPN.
Эслатиб ўтамиз, Криштиану 2021 йилда «Манчестер Юнайтед»га қайтган эди. 2022 йилнинг ноябрь ойида томонлар ўзаро келишувга асосан ҳамкорликни тўхтатишган.
